一隻口罩折射出人性嘅善惡美醜

「武漢肺炎」來襲，全城狂搶口罩，致使一罩難求。有黑心商囤積居奇、坐地起價，有市民瘋狂搶購囤積，有別有用心政客大肆造謠中傷港府同愛港組織藝人，有愛心人士義派口罩，有工廠趕工生產，有研發機構努力研製新型可複用布口罩……一隻口罩使人睇明人性嘅善惡美醜，折射出港人素養高低。

自1月22日香港首例確診「武漢肺炎」，到31日已有13例確診病人，疑似病例680宗，疫情嚴峻，無數醫護人員挺身而出、迎難而上，投身於呢場冇硝煙嘅「戰疫」中。口罩作為防疫嘅關鍵用具直接成為焦點。我哋睇到，港府竭力增加口罩供應量，接觸十幾個國家140幾個供應商，1月已促成800萬隻口罩供應香港零售市場，未來仲會促成2400萬個口罩供應零售市場，當能夠緩解市場供需不足問題。懲教署擬24小時趕工，日產口罩5萬個；「民建聯義工聯盟」捐贈5萬個口罩免費派畀市民，已係今晨派發完畢；一對愛心父子黃先生攞出自家多餘嘅650個口罩義務派發畀街坊；理大正研發可重用布口罩，10日後可派發10萬個，雖然有質疑布口罩防病毒功效，但畢竟真心為市民防疫。但係我哋亦睇到，媒體輿論卻大肆渲染「一罩難求」，市民搶購、市場售罄嘅消息漫天飛，更有黑心商囤積居奇、坐地起價，大撈黑心財，坊間有傳「民陣」囤積500萬盒口罩專門派畀遊行人士使用。更有甚者，散佈不實消息煽動攻擊愛港人士，近日，謠傳藝人楊明有份投資嘅燉湯店將派發十萬盒口罩，雖然訊息明顯弄虛作假，但「黃色」藝人阮民安竟然刻意分享相關訊息並要求線民「攞唔到記得即場X佢，拍爛佢度門，掃X跌曬佢啲嘢」，真係無恥之極。種種醜態，不一而足。

其實早有專家發聲，口罩並非預防肺炎病毒嘅唯一工具，而且只依賴口罩亦唔可以防止感染，更多嘅係做好個人防疫措施，包括勤洗手，儘量減少外出，尤其唔去人多嘅地方，先係保護自己同家人嘅最佳措施。一如黃絲政客所叫囂嘅「封關防病毒」根本目的只係借防疫大打政治牌，黃媒政客借口罩無端炒作、造謠同樣係居心叵測，市民唔可以輕易中招！2003年SARS、2013年禽流感，香港都闖咗過去，相信只要七百萬港人齊心協力，一定可以打贏呢場「戰疫」。