分裂旗幟自取其辱，五星紅旗高高飄揚

12月22日，香港再次發生暴徒侮辱五星紅旗事件，但係呢次肇事暴徒冇咁「好彩」，畀及時趕到嘅防暴警察當場拘捕，為佢可恥嘅犯罪行為付出咗慘重代價。該事件一經報導，毫無疑問引起眾怒——止暴治亂嘅大勢不可逆轉，仍有僥倖暴徒頂風作案、公然挑戰國家主權和象徵，咁叫「自作孽不可活」。肇事現場雖然出現咗各種分裂旗幟嘅「群魔亂舞」，但當警察一到就四散而逃；五星紅旗雖然畀暴徒揼喺地上，但喺市民心中仍然高高飄揚。香港永遠係中國嘅香港，分裂不得人心！

當日下午，一批心存幻想嘅暴徒喺中環發起集會，好似小丑咁賣力「表演」：現場唔單止有「港獨」旗，仲出現咗「藏獨」、「疆獨」、「青天白日滿地紅」旗，甚至仲出現咗英美國旗。如此眼花繚亂嘅「彩旗」背後，係亂港暴徒嘅迷茫與無助。此話怎講？所謂「病急亂投醫」，呢班暴徒真係病得唔輕。眼睇「大限已到」，呢啲跳樑小丑們已經亂曬方寸、冇曬章法，唔知道應該捉住邊一條「救命稻草」，祇能打出全部諗得到嘅「牌」，以求獲取多方支持、引發多方回應。殊不知，如此愚蠢嘅行為正好暴露咗暴徒本性——呢啲口口聲聲話為香港未來打拼嘅「民主衛士」，原來就係同搞「藏獨」、「疆獨」嘅分裂之徒無二！咁仲未算完，唔單止暴露咗自己，而且再次坐實咗亂港嘅幕後黑手——英美反華勢力。你話，呢啲「扶唔上壁嘅爛泥」，英美反華嘅「金主爸爸」們會有乜嘢感想？真係「唔怕神一樣嘅對手，就怕豬一樣嘅隊友」。

現場發生嘅一切，早已說明人心向背：暴徒雖然求助「各類神仙」，但現場市民根本不為所動，反而紛紛痛斥分裂行為。警方一到，「彩旗」紛紛棄之不顧，可見分裂行為根本見唔得光。相比起暴徒嘅狼狽，警察現場嘅一個「暖心」舉動感染者每一個愛港愛澳嘅市民：防暴警察先將地上嘅國旗執翻收好，然後果斷制服一名黑衣男子。照片顯示，該名警察一手舉起國旗一手捉住嫌犯，目光堅定咁向警車行去。嗰一刻，掉落嘅五星紅旗仍然喺我哋嘅心中高高飄揚！

五星紅旗代表著中國，神聖莊嚴、不容侵犯。前有梁振英懸賞100萬緝拿揼國旗入海嘅狂徒，後有14億國人爭當「護旗手」，人心所向、同仇敵愾！目前，止暴治亂已成社會共識，宵小暴徒已係窮途末路，此時仲要挑戰國家尊嚴，真係不自量力！最後，再將法律條文搬出嚟畀暴徒復習復習，「任何人公開及故意以焚燒、毀損、塗劃、玷污、踐踏等方式侮辱國旗或國徽，即屬犯罪，一經定罪，可處第5級罰款及監禁3年。」睇清楚，唔好後悔！